Пакрокавы майстар-клас па акварэлі ад дызайнера Дар’і Уласавой.
З матэрыялаў і інструментаў нам спатрэбяцца:
- планшэт;
- кнопкі;
- акварэльная папера шчыльнасцю 300 г/м2 (чым большая шчыльнасць, тым лепш);
- цвёрды аловак;
- гумка;
- акварэльныя фарбы;
- вада;
- латэкс для акварэльнага жывапісу;
- пэндзлі каланок або вавёрка (круглыя): № 2-5 для дробных дэталяў, № 6-10 для вялікай плошчы; плоскі сінтэтычны пэндзаль для змочвання паперы.
Працэс
1.Змочваем паперу вадой з двух бакоў. Нацягваем паперу на планшэт: кладзем мокрую паперу на чысты стол, зверху – планшэт. Загінаючы паперу па баках, замацоўваем яе кнопкамі да планшэта.
2.Простым алоўкам робім эскіз. Я малявала з натуры, папярэдне выставіўшы кампазіцыю: паставіла кубак, паклала печыва і ягады. Пачаткоўцам я б параіла папярэдне патрэніравацца ў накідах на асобным аркушы паперы, а пасля ўжо абраны варыянт намаляваць на “чыставіку”-планшэце.
3.Для зручнасці планшэт усталёўваем пад невялікім вуглом да стала. Працу акварэльнымі фарбамі пачынаем па мокрай паперы. Змочваем паперу вадой, наносім фарбу, якая вызначае колер прадмета (напрыклад, для печыва – охру, кубка і талеркі – блакітную і г.д.), дадзім ёй плаўна распаўсюдзіцца па аркушы.
4.Пасля высыхання першага слою, зноў змочваем паперу і наносім фарбу іншых колераў, фарміруючы святлоценявы малюнак прадметаў. Маем на ўвазе, што пры дзённым асвятленні цені халодныя, святло цёплае, а пры штучным – наадварот. Не забываемся на цені ад прадметаў.
5.Закончваем працу: удакладняем малюнак прадметаў “па сухім”, гэта значыць выкарыстоўваем фарбы з найменшай колькасцю вады і без папярэдняга змочвання паперы.
Парады ад Дар’і Уласавай:
- Акварэль павінна “дыхаць”, а малюнак – быць паветраным і лёгкім. Каб гэтага дасягнуць, трэба не забывацца на блікі. На этапе падрыхтоўкі эскіза іх можна нанесці з дапамогай латэксу для акварэльнага жывапісу. Пасля таго як малюнак будзе гатовы, з сухой паперы сціраем латэкс пальцам.
- Абавязкова спалучайце тэхніку малявання “па мокрым” і “па сухім”, гэта робіць акварэльны малюнак гарманічным і прыгожым.
- Пасля доўгіх эксперыментаў з паперай я зразумела, што лепш выкарыстоўваць шчыльную, бо яна дазваляе наносіць фарбу шматслойна і з вялікай колькасцю вады.
Ці хочаце памаляваць яшчэ?
Усе пакрокавыя майстар-класы па маляванні шукайце па спасылцы – http://alovakmag.by/be/majstar-klasy/drawing
(с) ALOVAK